Realtime blog statisticsweb statistics
udupibits.in
Breaking News
# ದೂರು ನೀಡಿ ವರ್ಷಗಳೇ ಕಳೆದರೂ, ಆರಂಭವಾಗದ ವಿಚಾರಣೆ: ಕರ್ನಾಟಕ ಮಾಹಿತಿ ಆಯೋಗದ ನಿಧಾನಗತಿ ವಿರುದ್ಧ RTI ಕಾರ್ಯಕರ್ತ ಶ್ರೀರಾಮ ದಿವಾಣರಿಂದ ಮುಖ್ಯ ಮಾಹಿತಿ ಆಯುಕ್ತರಿಗೆ ದೂರು.

ಕಾವ್ಯಲೋಕದ ಸುವರ್ಣ ತಿಲಕ, ನವೋದಯದ ಮುಂಗೋಳಿ, ‘ಕವಿ ಮುದ್ದಣ’

 
# ಜನವರಿ 24. ಕವಿ ಮುದ್ದಣರ 147ನೇ ಜನ್ಮ ದಿನ. ಇವರು ಉಡುಪಿ ಜಿಲ್ಲೆಯ ಕಾರ್ಕಳ ತಾಲೂಕಿನಿಂದ 15 ಕಿ.ಮೀ ದೂರದಲ್ಲಿರುವ ಹಚ್ಚ ಹಸಿರಿನ ಪ್ರಾಕೃತಿಕ ಸೌಂದರ್ಯ ಹೊಂದಿರುವ ನಂದಳಿಕೆ ಗ್ರಾಮದಲ್ಲಿ ಪಾಟಾಳಿ ತಿಮ್ಮಪ್ಪಯ್ಯ ಮತ್ತು ಮಹಾಲಕ್ಷ್ಮಮ್ಮ ದಂಪತಿಗಳಿಗೆ ಪುತ್ರನಾಗಿ ಜನವರಿ 24, 1870 ರಂದು ಜನಿಸಿದರು. ಇವರ ಮನೆ ಭಾಷೆ ತುಳು. ಮುದ್ದಣನ ನಿಜನಾಮ ನಂದಳಿಕೆ ಲಕ್ಷ್ಮೀನಾರಾಯಣ್ಯ. ಆದರೆ ಅವರು ಸಾಹಿತ್ಯ ಕ್ಷೇತ್ರದಲ್ಲಿ ಪ್ರಸಿದ್ಧಿ ಪಡೆದದ್ದು ‘ಮುದ್ದಣ’ ಕಾವ್ಯನಾಮದಿಂದ.
ಶಿಕ್ಷಣ ಮುಗಿಸಿದ ತರುವಾಯ ಮುದ್ದಣ, 1889ರಲ್ಲಿ ತನ್ನ19ನೇ ವರ್ಷದ ಪ್ರಾಯದಲ್ಲಿ ಉಡುಪಿಯ ಬೋರ್ಡ್ ಹೈಸ್ಕೂಲಿಗೆ ವ್ಯಾಯಾಮ ಶಿಕ್ಷಕರಾಗಿ ನೇಮಕಗೊಂಡು ವೃತ್ತಿ ಜೀವನ ಪ್ರಾರಂಭಿಸಿದರು. ಅನಂತರ ಕುಂದಾಪುರ ಬೋರ್ಡ್ ಹೈಸ್ಕೂಲಿಗೆ ವರ್ಗಾವಣೆಗೊಂಡು ಅಲ್ಲಿ ಸ್ವಲ್ಪ ವರ್ಷ ಸೇವೆ ಸಲ್ಲಿಸಿ ಪುನಃ ಉಡುಪಿಗೆ ಬಂದು ಕ್ರೀಶ್ಚನ್ ಹೈಸ್ಕೂಲಿಗೆ ಕನ್ನಡ ಪಂಡಿತರಾಗಿ ಸೇವೆ ಮುಂದುವರೆಸಿದರು.
ಮುದ್ದಣ, 1893ರಲ್ಲಿ ಶಿವಮೊಗ್ಗ ಜಿಲ್ಲೆಯ ಕಾಗೆ ಕೊಡಮಗ್ಗಿಯ ‘ಕಮಲ ಬಾಯಿ’ಯನ್ನು ತನ್ನ 23ನೇ ಪ್ರಾಯದಲ್ಲಿ ವಿವಾಹವಾದರು. ಕಮಲ ಬಾಯಿಯೊಂದಿಗೆ ಕೇವಲ 8 ವರ್ಷದ ಸುಮಧುರ ದಾಂಪತ್ಯ ಜೀವನ ನಡೆಸಿದ ಮುದ್ದಣರು, ತೀವ್ರ ಅನಾರೋಗ್ಯಕ್ಕೆ ತುತ್ತಾಗಿ ಫೆಬ್ರವರಿ 15, 1901ರಂದು ತನ್ನ 31ರ ಸಣ್ಣ ಪ್ರಾಯದಲ್ಲಿ ನಿಧನರಾದರು. ಅವರು ನಮನ್ನು ಅಗಲಿ 116 ವರ್ಷಗಳು.
‘ಕವಿ ಮುದ್ದಣರನ್ನು ನವೋದಯದ ಮುಂಗೋಳಿ’ ಎಂದು ಕರೆಯುತ್ತಾರೆ. ಇವರು ಹೊಸಗನ್ನಡ ಕಾವ್ಯ ಪರಂಪರೆಗೆ ನಾಂದಿ ಹಾಡಿದ ಕವಿ. “ಹಳೆಗನ್ನಡ… ಹೊಸಗನ್ನಡ ಹಾರದ, ಮದ್ಯಮಣಿ… ನಮ್ಮ ಮುದ್ದಿನ ಮುದ್ದಣ” ಎಂದು ವಿದ್ವಾಂಸರಾದ ಸೇಡಿಯಾಪು ಕೃಷ್ಣ ಭಟ್ಟರು, ಕಾವ್ಯಾತ್ಮಕವಾಗಿ ಕವಿ ಮುದ್ದಣರನ್ನು ಬಣ್ಣಿಸಿದ್ದಾರೆ. ಇವರು ತಮ್ಮ ಅಲ್ಪಕಾಲದ ಜೀವಿತಾವಧಿಯಲ್ಲಿ ಮಾಡಿದ ಸಾಧನೆ ಅಮೋಘವಾದದ್ದು. ಮುದ್ದಣರ ಜೀವನ ಪಥದ ಯಶೋಗಾಥೆ, ಕೃತಿ ಪರಿಚಯ, ಖಾಸಗಿ ವಿಚಾರ, ಇವುಗಳ ಬಗ್ಗೆ ಖ್ಯಾತ ನಾಮ ಸಾಹಿತಿಗಳು ಬಹಳಷ್ಟು ಗ್ರಂಥಗಳನ್ನು ಪ್ರಕಟಿಸಿದ್ದಾರೆ. ಇವರ ಕೃತಿಗಳು ವಿದ್ಯಾಸಂಸ್ಥೆಗಳಲ್ಲಿ ಪಠ್ಯ ಪುಸ್ತಕಗಳಾಗಿವೆ.
ಕರಾವಳಿಯ ಗಂಡು ಕಲೆ ಯಕ್ಷಗಾನದ ಮೇಲೆ ಮುದ್ದಣರಿಗೆ ಬಹಳಷ್ಟು ಆಸಕ್ತಿ ಇತ್ತು. ರತ್ನಾವತಿ ಕಲ್ಯಾಣ, ಕುಮಾರ ವಿಜಯ ಎಂಬ ಎರಡು ಯಕ್ಷಗಾನ ಪ್ರಸಂಗ ಬರೆದಿದ್ದಾರೆ. ಅದ್ಭುತ ರಾಮಾಯಣ, ಶ್ರೀರಾಮಾಶ್ವಮೇಧ ಗದ್ಯಕಾವ್ಯ ಮತ್ತು ಶ್ರೀರಾಮ ಪಟ್ಟಾಭಿಷೇಕದಂತಹ ಪದ್ಯಕಾವ್ಯ ಸೇರಿ ಹಲವು ಕೃತಿಗಳನ್ನು ಕನ್ನಡ ಸಾಹಿತ್ಯಲೋಕಕ್ಕೆ ಸಮರ್ಪಣೆ ಮಾಡಿದ್ದಾರೆ.
ಇವರು ಕಾವ್ಯ ಕಟ್ಟುವ ಶೈಲಿ ಅದ್ಭುತವಾದದ್ದು. ಮುದ್ದಣರು ನಂದಳಿಕೆ ಗ್ರಾಮದಲ್ಲಿ ಬಡತನದಲ್ಲೆ ಬೆಳೆದು, ಸಾಧನೆಗೆ ಉಡುಪಿಯನ್ನು ಕರ್ಮಭೂಮಿಯಾಗಿಸಿಕೊಂಡಿದ್ದರು. ಉಡುಪಿಯ ಪ್ರಮುಖ ರಸ್ತೆಗಳಲ್ಲಿ ತಮ್ಮ ಪವಿತ್ರ ಪಾದ ಸ್ಪರ್ಶ ಮಾಡಿ, ಹೆಜ್ಜೆ ಗುರುತುಗಳ ಮೂಡಿಸಿದ್ದರು. ಉಡುಪಿ ನಗರಸಭೆ ನಗರದ ಪ್ರಮುಖ ರಸ್ತೆಗೆ “ಕವಿ ಮುದ್ದಣ ಮಾರ್ಗ” ಎಂದು ನಾಮಕರಣ ಮಾಡಿದೆ.  ನಗರಸಭೆ ಕಛೇರಿ ಆವರಣದಲ್ಲಿ ಮುದ್ದಣರ ಶಿಲಾ ಪುತ್ಥಳಿ ಸ್ಥಾಪಿಸುವ ಮೂಲಕ ಗೌರವ ಸಲ್ಲಿಸಿದೆ. ಮುದ್ದಣರು ನಂದಳಿಕೆಯ ‘ನಂದಾದೀಪ’ವಾಗಿ ಪ್ರಜ್ವಲಿಸಿದರು. ನಂದಳಿಕೆ ಎಂದು ಪುರನಾಮ ಕೇಳಿ ಬಂದಾಗ…. ‘ಕವಿ ಮುದ್ದಣ’ ಎಂಬ ಶುಭನಾಮ ನೆನಪಿಗೆ ಬರುವಂತಾದರು.
* ತಾರಾನಾಥ್ ಮೇಸ್ತ ಶಿರೂರು

Leave a Reply

Your email address will not be published. Required fields are marked *