Realtime blog statisticsweb statistics
udupibits.in
Breaking News
ಉಡುಪಿ: ಕನಿಷ್ಠ ಕುಡಿಯುವ ನೀರಿನ ಸಮಸ್ಯೆ ಪರಿಹರಿಸಲು ನಗರಸಭೆ, ಜಿಲ್ಲಾಡಳಿತ, ರಾಜ್ಯ-ಕೇಂದ್ರ ಸರಕಾರ ಸಂಪೂರ್ಣ ವಿಫಲ !

ಪುತ್ತೂರು ಕ್ಷೇತ್ರದ ಚಾರಿತ್ರಿಕ ಹತ್ತು ಚೋದ್ಯಗಳು ಮತ್ತು ಪೊಳಲಿ ಕ್ಷೇತ್ರ- ಭಾಗ 7

* ಡಾ.ಮ.ಸು.ಅಚ್ಚುತ ಶರ್ಮಾ

# ಸಾಧಾರಣ ಇಂಗ್ಲೀಷರಿಗೆ ಸೇರಿದ ಎರಡು ಮೂರು ವರ್ಷದಲ್ಲಿ ಜಂಗಮರ ಕುಲದವನಾದ ಕಲ್ಯಾಣಪ್ಪನೆಂಬ ತುಂಡು ಪಾಳೆಗಾರನು ಮತ್ತು ಇವನ ಅನುಯಾಯಿಗಳಾಗಿ ಶ್ರೀ ಮರಸುಳ್ಯದ ಗೌಡರೇ ಮೊದಲಾದವರು ಒಂದು ಕೂಟ ಕೂಡಿಕೊಂಡು ಊರಿನ ಸ್ವತಂತ್ರಕ್ಕಾಗಿ ಬ್ರಿಟಿಷರ ವಿರೋಧವಾಗಿ ಯುದ್ಧವನ್ನು ಹೂಡಿದರು. ಪುತ್ತೂರು ವರೇಗೂ ಬಂದು ಇಂಗ್ಲೀಷ್ ಸರಕಾರದ ಕೋರ್ಟು ಕಚೇರಿ ಮುಂತಾದುವನ್ನು ವಶಪಡಿಸಿ ಇಂಗ್ಲೀಷರನ್ನು ಓಡಿಸಲು ಪ್ರಯತ್ನಿಸಿದರು. ಆದರೆ ಕಡೆಗೆ ಇಂಗ್ಲೀಷ್ ಸರಕಾರದವರಿಂದ ಇವರೆಲ್ಲಾ ಸೆರೆ ಹಿಡಿಯಲ್ಪಟ್ಟರು. ಈ ಸಮರಕ್ಕೆನೇ ಕಲ್ಯಾಣಪ್ಪನ ಕಾಟುಕಾಯಿ ಎಂಬ ಹೆಸರು ಚರಿತ್ರೆಯಲ್ಲಿ ಬಂತು. ಪುತ್ತೂರು ಬ್ರಿಟಿಷರ ಆಳ್ವಿಕೆಗೆ ಬಂದ ನಂತರ ಕಲ್ಯದಲ್ಲಿದ್ದ ಕೋರ್ಟು ಕಛೇರಿಗಳು ಪುತ್ತೂರಿಗೆ ಸೇರಿತು.

ನಗರ ಸಂಸ್ಥಾನದ ಮತ್ತು ಅವರ ಪೂರ್ವಿಕರ ಆಳ್ವಿಕೆಯಂತೆಯೂ ಸರಕಾರಕ್ಕೆ ಇತರರಿಂದ ಸಂದಾಯವಾಗತಕ್ಕ ಕಂದಾಯವು ಬ್ರಿಟಿಷ್ ಸರಕಾರಕ್ಕೂ ವಸೂಲು ಆಗುತ್ತಿತ್ತು. ವಿಚಾರ ಸಚಾರಗಳು ನ್ಯಾಯ ತೀರ್ಪುಗಳು ಮುಂಚಿನಂತೆ ನಡೆಯುತ್ತಿತ್ತು. ತಾವು ಮಾಡಿದ ಕಾನೂನಿನ ನಿಬಂಧನೆಗಳಿಗನುಣವಾಗಿ ಗ್ರಾಮದ ಕೆಲವು ಮುಖ್ಯಸ್ಥರು ರಾಜಧಾನಿಗೆ ಹೋಗಿ ಕೈ ಕಾಣಿಕೆ ಎಂಬ ಮುಂಗಡ ಹಣ ಕೊಟ್ಟು ಕೆಲವು ಗ್ರಾಮಗಳ ಕಂದಾಯ ವಸೂಲಿ ಹಕ್ಕು (ಸ್ಥಳವನ್ನು ದರ್ಕಾಸ್ತಿಗೆ ತೆಗೆದುಕೊಳ್ಳುವ ರೀತಿಯಲ್ಲಿ) ಕೆಲವು ವರ್ಷಗಳ ಅವಧಿಗೆ ಕಂಟ್ರಾಕ್ಟಿಗೆ ವಹಿಸಿಕೊಳ್ಳುತ್ತಿದ್ದರು.

ಕಂಟ್ರಾಕ್ಟು ಅಂದರೆ ಗುತ್ತೆಗೆ ವಹಿಸಿಕೊಳ್ಳುವುದೆಂದು ಆಗಿನ ಹೆಸರು. ಆ ರೀತಿ ವಹಿಸಿಕೊಂಡವರಿಗೆ ಗುತ್ತೆದಾರರೆಂದು ಹೆಸರು ಬಂತು. ಅವರನ್ನೇ ಗುತ್ತಿನವರು ಎಂದು ಕರೆಯುತ್ತಾರೆ. ಈ ರೀತಿ ಅಲ್ಲಿ ವಹಿಸಿಕೊಂಡು ಬಂದ ಗುತ್ತಿನವರಿಗೆ ತಮ್ಮ ತಮ್ಮ ಅಧಿಕಾರಕ್ಕೆ ಒಳಪಟ್ಟ ವಾರ್ಡುಗಳಲ್ಲಿ ಸರ್ವ ಸಾಧಾರಣದ ಕ್ರಿಮಿನಲ್ ಸಿವಿಲ್ ದಾವೆಗಳು ತೀರ್ಮಾನ ಮಾಡುವ ಅಧಿಕಾರ ಅವರಿಗಿತ್ತು. ಹೆಚ್ಚಿನ ದಾವೆಗಳು ಪಂಚಾಯಿತಿಯಿಂದ ತೀರ್ಮಾನವಾಗಿತ್ತು. ಪಂಚಾಯಿತಿಯಿಂದ ತೀರ್ಮಾನ ಪಡೆಯದ ದಾವೆಗಳನ್ನು ಪ್ರತಿ ಗ್ರಾಮದಲ್ಲಿರುವ ಗ್ರಾಮ ದೇವಸ್ಥಾನದಲ್ಲಿ ಅಲ್ಲಿಯ ಅರ್ಚಕ ಮತ್ತು ಪೂಜೆಯವನಾದ ಸ್ಥಾನಪತಿ, ಸ್ಥಾನಿಕರು ದೇವಸ್ಥಾನ ಸನ್ನಿಧಿಯಲ್ಲಿ ವಾದಿ ಪ್ರತಿವಾದಿಗಳನ್ನು ನಿಲ್ಲಿಸಿ ”ತಾನು ದೇವರ ಮುಂದೆ ಸತ್ಯ ಹೇಳುತ್ತೇನೆ ಸುಳ್ಳು ಹೇಳುವುದಿಲ್ಲ” ಎಂದು ಗೀತಾ ಪುಸ್ತಕಗಳನ್ನು ಹಿಡಿಸಿ ಹೇಳಿಸಿ ಅವರ ತನಿಖೆಯನ್ನು ನಡೆಸುತ್ತಿದ್ದರು. ಅಲ್ಲಿ ಊರಿನ ಪಂಚಾಯಿತಿಯವರು ದೇವಳದ ಸ್ಥಾನಪತಿಯವರು ಕೂಡಿ ಇತ್ಯರ್ಥವನ್ನು ಮಾಡಿ ತೀರ್ಪು ಕೊಟ್ಟು ದಂಡನೆಗಳನ್ನು ವಿಧಿಸುತ್ತಿದ್ದರು. ಆ ದಂಡನೆ ಹಣವು ದೇವಸ್ಥಾನಗಳ ಸದ್ರಿ ವಿನಿಯೋಗಗಳಿಗೆ ಸಲ್ಲುತ್ತಿತ್ತು. ಅಲ್ಲಿನ ತೀರ್ಪು ಸರಿ ಇಲ್ಲದಿದ್ದಲ್ಲಿ ಅದರ ಅಪೀಲು ಸೀಮೆ ದೇವಸ್ಥಾನಗಳಲ್ಲೂ, ಸೀಮೆ ದೇವಸ್ಥಾನಗಳ ಮೇಲಿನ ಅಪೀಲು ಮಂಡಲ ದೇವಸ್ಥಾನಗಳಲ್ಲೂ ಈಗ ಮುನ್ಸಿಪ್ ಕೋರ್ಟು, ಡಿಸ್ಟ್ರಿಕ್ಟ್ ಜಡ್ಜರ ಕೋರ್ಟು ಮತ್ತು ಹೈಕೋರ್ಟುಗಳಂತೆ ನಡೆಯುತ್ತಿತ್ತು. ಹೆಚ್ಚಿನ ತೀರ್ಮಾನಗಳೂ ರಾಜಿ ಪಂಚಾಯಿತಿಯಿಂದಲೇ ತೀರುತ್ತಿತ್ತು. ಈ ವ್ಯಾಜ್ಯಗಳಿಗೆ ಈಗಿನಂತೆ ಫೀಸುಗಳು ಏನೂ ಇರುತ್ತಿರಲಿಲ್ಲ.

ಮುಂದುವರಿಯುವುದು

Leave a Reply

Your email address will not be published. Required fields are marked *